Ra’iisul Wasaaraha Xukuumadda Jamhuuriyadda Federaalka Soomaaliya Xamsa Cabdi Barre ayaa sheegay ururka Xamaas ee Reer Falastiin aanu ahayn argagixiso, balse uu u dagaalamayo xoriyad.
Xamsa oo ka qeyb galay xus Siyaaro ahaa oo Muqdisho ka dhacay ayaa si weyn ugu garab istaagay ururka Xamaas iyo Dagaalka uu kula jiro Israel, wuxuuna eedeyn culus u jeediyay reer Galbeedka oo uu sheegay inay been ahayd xuquuqda Bani’aada ee ay sheegan jireen inay u doodayaan.
Dhinaca kale wuxuu ku booriyey culimada Soomaaliyeed in ay hoggaamiyaan dagaalka lagula jiro kooxaha Khawaarijta oo ah mid lagu difaacayo diinta iyo jiritaanka ummadda Soomaaliyeed.
“Markii dalku halis galo dadkii hubka qaatay waxay ahaayeen culimada Soomaaliyeed oo ummadda ku hoggaaminayey difaaca dalkooda, maanta dadkeennii iyo diinteennii Khawaarij baa ku soo duushay waana in culimadu ay qaataan doorkooda hoggaaminta dagaalka Khawaarijta”. ayuu yiri Ra’iisul Wasaaraha.
