Ra’iisul Wasaaraha Xukuumadda Federaalka Soomaaliya, Xamza Cabdi Barre, oo ku sugan madasha kalfadhiga 78-aad ee Golaha Guud ee Qaramada Midoobay ee ka dhacaya New York, ayaa halkaas ka wada kulamo doceedyo uu la yeeshay madax kala duwan oo ka socota caalamka, isagoo xooga saaraya xoojinta xiriirka diblomaasiyadeed iyo iskaashiga Soomaaliya kala dhaxeeya dalalkaasi.
Mid kamid ah kulamada ugu muhiimsan ee uu Ra’iisul Wasaaruhu yeeshay wuxuu ahaa la-kulankii uu la qaatay wasiiru-dowlaha wasaaradda arrimaha dibedda ee Imaaraadka Carabta, Sheekh Shakhboot Nahyan Al Nahyan. Labada masuul ayaa si qoto dheer uga wada hadlay adkeynta xiriirka soo jireenka ah ee Soomaaliya iyo Imaaraadka, iyagoo isla falanqeeyay fursadaha cusub ee iskaashiga dhinacyada ganacsiga, horumarinta iyo la-dagaallanka argagixisada, kuwaas oo muhiim u ah labada dal.
Sidoo kale, Ra’iisul Wasaare Xamza ayaa kulan kale oo muhiim ah la yeeshay madaxweynaha dalka Suudaan, Abdel-Fattah Al-Burhan. Kulankooda ayaa diiradda lagu saaray xoojinta iskaashiga iyo xiriirka walaaltinimo ee u dhaxeeya labada dal ee Soomaaliya iyo Suudaan. Waxay sidoo kale si gaar ah uga wada hadleen colaadda ka taagan Suudaan, iyagoo isku raacay in xal waara laga gaaro dhibaatooyinka siyaasadeed iyo colaadaha ka jira dalkaas, si loo badbaadiyo nolosha shacabka Suudaan.
Intii uu ku sugnaa New York, Ra’iisul Wasaare Xamza Cabdi Barre ayaa sidoo kale kulamo kala duwan la yeeshay madax ka socota dalal kale oo muhiim u ah xiriirka diblomaasiyadeed ee Soomaaliya. Wuxuu si gaar ah diiradda u saaray sidii kor loogu qaadi lahaa iskaashiga caalamiga ah, gaar ahaan dagaalka ka dhanka ah kooxaha argagixisada ah ee ka jira gobolka, taas oo qayb ka ah qorshaha dowladda Soomaaliya ee lagu xasilliyo amniga iyo nabadda dalka.
Waxaa muuqata in booqashadan uu Ra’iisul Wasaaruhu ku tagay madasha Qaramada Midoobay ay muhiim u tahay sare u qaadista xiriirka diblomaasiyadeed ee Soomaaliya, iyadoo sidoo kale fursad u tahay dowladda Soomaaliya in ay soo bandhigto qorsheyaasheeda ku aaddan la dagaallanka argagixisada iyo horumarinta dalka.
