Madaxweynaha Somaliland, Cabdiraxmaan Maxamed Cabdillaahi (Cirro), ayaa lagu wadaa inuu toddobaadka soo socda booqasho rasmi ah ku tago Israel, halkaas oo uu kula kulmi doono madaxda ugu sarreysa dalkaasi, sida uu qoray wargeyska YnetNews.
Wararka ayaa sheegaya in safarka Madaxweynaha uu dhici doono inta u dhaxaysa 15-ka illaa 17-ka Juun, iyadoo booqashadu qayb ka tahay xoojinta xiriirka diblomaasiyadeed ee u dhexeeya Somaliland iyo Israa’iil.
Sida lagu daabacay warbixinta, qodobka ugu weyn ee safarka ayaa noqon doona furitaanka safaaradda Somaliland ee magaalada Jerusalem, taas oo noqon karta safaaraddii ugu horreysay ee Somaliland ka furato dal shisheeye.
Madaxweyne Cirro ayaa sidoo kale la filayaa inuu kulamo la yeesho Madaxweynaha Israa’iil, Isaac Herzog, iyo Ra’iisul Wasaaraha Israa’iil, Benjamin Netanyahu.
Xiriirka u dhexeeya Somaliland iyo Israel ayaa si weyn u xoogaystay kadib markii Israa’iil bishii Diseembar 2025 noqotay dalkii ugu horreeyay ee si rasmi ah u aqoonsada Somaliland. Tan iyo xilligaas, labada dhinac ayaa is dhaafsaday safiirro, iyadoo la sheegay in iskaashigooda uu diiradda saarayo dhinacyada amniga, ganacsiga, tiknoolajiyadda iyo danaha istiraatiijiga ah ee Geeska Afrika.
Dowladda Federaalka Soomaaliya ayaa si adag uga hortimid aqoonsiga Israa’iil ee Somaliland, iyadoo ku tilmaantay tallaabadaasi mid xadgudub ku ah madaxbannaanida iyo midnimada dhuleed ee Soomaaliya. Sidoo kale, ururro iyo dalal ka tirsan dunida Carabta iyo Afrika ayaa walaac ka muujiyay aqoonsiga Somaliland.
Ilaa hadda, xukuumadda Somaliland si rasmi ah ugama hadlin wararka sheegaya safarka Madaxweyne Cirro iyo qorshaha furitaanka safaaradda Qudus.
