Maanta oo Talaado ah ayaa lagu wadaa in magaalada New York si rasmi ah uga billowdaan khudbadaha hogaamiyaasha caalamka, kuwaas oo qeyb ka ah shirweynaha Golaha Guud ee Qaramada Midoobay. Shirkan oo ah kii 79-aad ee Golaha Guud, ayaa ah fagaare muhiim ah oo sanadle ah, waxaana diiradda lagu saaraa arrimaha ugu waaweyn ee caalamka ka taagan, iyada oo madaxda aduunka ay fursad u helaan inay ka hadlaan dhibaatooyinka, xalalka, iyo qorshayaasha ay ku wajahaan caqabadaha caalamiga ah.
Shirkan ayaa waxaa ka soo qeybgalaya 76 madaxweyne, afar madaxweyne ku xigeen, labo amiir, 42 madax dowladeed, 9 Ra’iisul wasaare ku xigeen, iyo 54 wasiir. Tani waxay muujineysaa muhiimadda iyo saameynta weyn ee kulankan ku leeyahay siyaasadda caalamka, maadaama uu noqday goob ay madaxdu kaga hadlayaan arrimaha khuseeya amniga, horumarka, iyo xasiloonida adduunka.
Madaxda la filayo inay maanta khudbadahooda jeediyaan waxaa ka mid ah Madaxweynaha Mareykanka, Joe Biden, oo ah mid ka mid ah hoggaamiyaasha ugu saameynta badan caalamka, isaga oo diiradda saaraya arrimaha amniga caalamiga ah iyo xiriirka Mareykanka ee caalamka intiisa kale. Sidoo kale, Madaxweynaha Turkiga, Recep Tayyip Erdogan, ayaa khudbad ka jeedin doona, iyadoo la filayo inuu ka hadlo arrimaha Bariga Dhexe, xiisadaha ka taagan Suuriya iyo xasaradaha gobolka Caucasus, iyo sidoo kale xiriirka Turkiga ee la yaal NATO iyo Midowga Yurub.
Amiirka Qatar, Sheekh Tamim bin Hamad al-Thani, oo sidoo kale kamid ah hoggaamiyaasha caalamka maanta hadlaya, ayaa diiradda saari doona xaaladda Bariga Dhexe iyo dadaalka Qatar ee ku aaddan dhexdhexaadinta xiisadaha gobolka, gaar ahaan arrimaha Falastiin iyo Israel. Madaxweynaha South Africa, Cyril Ramaphosa, ayaa khudbaddiisa ku qaadaa-dhigi doona arrimaha Afrika, gaar ahaan dagaalada ka socda Suudaan, iyo doorka dalkiisa ee xallinta khilaafaadka qaaradda Afrika.
Ra’iisul Wasaare Xamse iyo wafdi wasiirro ah oo uu hogaaminayo ayaa ku mataalaya Soomaaliya waxaana la filaaya in uu ka hadlo xiisadda Gobolka, gaar ahaan xadgudubka Itoobiya ay ku samaysay Soomaaliya.
Shirka sanadkan wuxuu ku soo aaday xilli xiisado caalami ah ay meel sare gaareen, gaar ahaan dagaallada Ukraine iyo Ruushka, colaadda Suudaan ee aan wali laga gaarin xal waara, iyo xaaladda Bariga Dhexe oo marba marka ka dambeysa sii cakirmeysa. Waxaa la filayaa in madaxda caalamka ay si gaar ah uga hadlaan dagaallada Suudaan, Ukraine, iyo xiisadaha ka aloosan Bariga Dhexe, iyadoo la raadinayo xalal siyaasadeed iyo wadaxaajood ku saleysan amniga iyo xasiloonida caalamiga ah.
Intaa waxaa dheer, shirka Golaha Guud ee Qaramada Midoobay waxaa sidoo kale looga hadli doonaa arrimaha muhiimka ah sida isbeddelka cimilada, saboolnimada, iyo horumarinta waara, iyadoo wadamada saboolka ah iyo kuwa soo koraya ay doonayaan in miisaan dheeraad ah lagu siiyo ajendeyaasha la xiriira caqabadaha dhaqaale iyo saamaynta cimilada ee ay la tacaalayaan.
