Ra’iisul Wasaare Hamza Abdi Barre ayaa ka hadlay weerarkii shalay ka dhacay saldhigga Booliiska ee magaalada Muqdisho, kaas oo uu sheegay in uu ka dambeeyey farriin cad oo muujineysa in Muqdisho aysan u qalmin hormar iyo xasillooni.
“Falkii shalay lagu weeraray saldhigga Booliiska, waxaa uu xambaarsanaa farriin ah in Muqdisho aysan qaadi karin horumar iyo nabadgelyo, waxaana lagu diidanaa in muwaadiniinta la siiyo xuquuqda dastuuriga ah ee ay leeyihiin, iyo sidoo kale la dagaalanka Khawaarijta,” ayuu yiri Ra’iisul Wasaare Hamza Abdi Barre.
Ra’iisul Wasaare Hamza wuxuu ugu baaqay hay’adaha amniga inay sare u qaadaan hawlgallada ammaanka si ay u sugaan badbaadada muwaadiniinta. Waxa uu sidoo kale ka digay in la ogolaado falal dambiyeed oo ka dhan ah nabadgelyada guud ee dalka.
“Hay’adaha amniga waxaan farayaa in ammaanka muwaadiniinta ay sugaan, kana hortagaan cid kasta oo ku kacda fal dambiyeed,” ayuu hadalkiisa ku daray.
Ra’iisul Wasaaraha ayaa caddeeyey in dowladda ay diyaar u tahay inay qaaddo tallaabooyin adag oo lagaga hortagayo kooxaha doonaya inay carqaladeeyaan nabadda iyo xasilloonida Soomaaliya, isagoo ku boorriyay shacabka inay ka qayb qaataan sidii dalka loo ilaalin lahaa.
