Dowladda Federaalka Soomaaliya ayaa Gaashaanle Dhexe Sadiiq Aadan Cali (Duudishe) u magacowday Taliyaha Qeybta Booliska Gobolka Baay ee maamulka Koonfur Galbeed Soomaaliya, iyadoo xilkaasi uu kala wareegayo Amiin Mad-daruur.
Wararka ayaa sheegaya in Amiin uu ka mid ahaa saraakiisha ku sugan magaalada Baydhabo ee la safan Cabdicasiis Xasan Maxamed Laftagareen, isla markaana uu diiday inuu u hoggaansamo amar kaga yimid dowladda Federaalka oo ahaa inuu yimaado Muqdisho.
Magacaabista Sadiiq Aadan Cali ayaa ku soo beegmeysa xilli xasaasi ah oo ay taagan tahay xiisad siyaasadeed oo u dhaxeysa dowladda dhexe iyo maamulka Koonfur Galbeed, gaar ahaan dhinacyada ammaanka iyo maamulka ciidamada.
Sadiiq Duudishe ayaa leh khibrad dheer, isagoo muddo ku dhow 20 sano ka tirsanaa Ciidanka Booliska Soomaaliyeed.
Waxa uu sidoo kale Layli Sarkaalnimo ku soo qaatay dalka dibadiisa intii u dhaxeysay 2007 ilaa 2010, wuxuuna soo qabtay jagooyin kala duwan oo ay ka mid yihiin Afhayeenka Booliska, Taliye Xigeenka CID, iyo Taliye Xigeenka Hoggaanka Howlaha Booliska.
Magacaabistan ayaa loo arkaa mid qeyb ka ah qorsho dowladda Federaalka ay ku xoojinayso siddii gacanta ay u dhigi laheyd magaalada Baydhabo, xilli uu jiro khilaaf siyaasadeed oo weli taagan.
