Wasiirka Gargaarka iyo Musiibooyinka Puntland, Ubax Cabdirashiid Maxamed Xirsi, ayaa jawaab ka bixisay hadal uu sheegay Guddoomiyaha Hay’adda Maareynta Musiibooyinka (SODMA), Maxamuud Macallin, kaasoo sheegay in madaxweynaha Puntland uu diiday in hay’adda SODMA ay mucaawino gaarsiiso degaanada Calmiskaad ee laga saaray Daacish.
Wasiir Ubax ayaa sheegtay in Puntland aysan u baahnayn dawo dhacday iyo agab aan waxtar lahayn, iyadoo tusaale u soo qaadatay dawooyin dhacay iyo agabka COVID-19 oo ay sheegtay in SODMA ay geysay degmada Moqokori ee gobolka Hiiraan xilli shacabka deegaankaasi ay u baahnaayeen dawooyin dhiig-joojin ah, maaddaama ay dagaallo kula jireen Alshabaab.
Wasiir Ubax ayaa tiri: “Puntland ma face Mask iyo COVID-19 baad keeni lahaydeen iyo dawo dhacday sida Hiiraan aad yeesheen.”
Guddoomiyaha SODMA oo ka hadlayay magaalada Jalalaqsi ee gobolka Hiiraan, ayaa sheegay inuu si shaqsi ah ula soo xiriiray Madaxweynaha Puntland Siciid Cabdullaahi Deni, isaga oo ka codsaday ogolaansho in SODMA ay u daadgureyso askarta dhaawacan daaweyn iyo in gargaar bani’aadamnimo la gaarsiiyo dadka u baahan.
Hase yeeshee, wuxuu sheegay in Deni uu codsigaas ku gacan seyray, isaga oo ku sababeeyay khilaafka siyaasadeed ee kala dhexeeya Madaxweynaha Soomaaliya Xasan Sheekh Maxamuud iyo Ra’iisul Wasaare Xamsa Cabdi Barre.
