Halyeeygii hore ee Manchester United, Gary Neville, ayaa aaminsan in Kobbie Mainoo uu ka fikirayo inuu ka tago Old Trafford xagaagan, isagoo tusaale ka qaadan kara Marcus Rashford iyo Alejandro Garnacho.
Mainoo, oo loo arko mid ka mid ah da’yarta ugu hibada badan ee kasoo baxay akadeemiyada United sannadihii ugu dambeeyay, ayaa lagu waramayaa in mustaqbalkiisa kooxda uu mugdi soo galayo.
Xilli ciyaareedkii hore, oo loo aqoonsaday kii ugu liitay United taariikhda Premier League, Mainoo waxa uu kaliya ku soo bilowday 19 kulan. Xilli ciyaareedkan cusubna, weli ma uusan ciyaarin wax kulan ah oo horyaalka.
Inkasta oo uu ka soo muuqday kulankii Carabao Cup ee Arbacadii, habeenkaasi waxa uu u noqday mid laga xumaado kadib markii United ay si lama filaan ah uga hareen tartanka, iyadoo Grimsby Town koox ka ciyaarta League Two ay ka takhalustay.
Waxaa la fahamsan yahay in Mainoo uu si dhab ah u tixgelinayo mustaqbalkiisa Old Trafford, isla markaana uu diyaar u noqon karo bixitaan haddii uu soo baxo dalab macquul ah ka hor inta uusan suuqa xirmin.
Wararka ayaa sheegaya in ilaa toban kooxood ay si dhow ula socdaan xaaladdiisa, halka United la sheegay inay diyaar u yihiin inay iib geeyaan haddii loo soo bandhigo qiyaastii £45 milyan.
W/Q Maxamed Xasan Nuur {Jillibeey}
