Magaalada Beledxaawo ee gobolka Gedo ayaa saaka ku waabariisatay xaalad ka duwan tii maalmaha lasoo dhaafay, kaddib dagaallo qaraar oo muddo dhowr maalmood ah ka socday halkaasi, kuwaas oo u dhexeeyay ciidamada Dowladda Federaalka Soomaaliya (DFS) iyo kuwa Jubbaland.
Deganaanshaha cusub ayaa yimid kaddib qorshe waan-waan ah oo lala galay ciidamadii taabacsanaa Jubbaland, taasoo horseedday in lagu guuleysto joojinta dagaalka.
Waxaa gacanta DFS galay xarumo istiraatiiji ah oo ay ka mid yihiin xarunta degmada, saldhigga booliiska, iyo xarunta socdaalka (Immigration), iyadoo la sheegay in ciidamadaas uu hoggaaminayo Abdirashid Janan, taliyaha howlgalka Gobolka Gedo ee NISA.
Dhinaca kale, ciidamadii Jubbaland ayaa lagu soo waramayaa in ay u ruqaansadeen dhanka xadka Kenya, iyagoo aan wax iska caabin ah sameynin markii dambe. Waxaa la tilmaamayaa in saaka magaalada Beledxaawo ay ku sugan tahay xaalad dagan, iyadoo ciidamada DFS ay si buuxda u maamulayaan amniga.
