Guddoomiyaha Gobolka Banaadir ahna Duqa magaalada Muqdisho Mudane Dr. Xasan Maxamed Xuseen (Muungaab) ayaa maanta Aqalka Dowladda Hoose ee Xamar ku qaabilay Safiirka Dalka Imaaraadka Carabta u fadhiya Soomaaliya, Danjire Axmed Jumca Alromithi, iyagoona ka wada hadlay taageeridda dadaallada Maamulka Gobolku uu ugu jiro dib-u-dhiska, bilic-soo-celinta iyo horumarinta caasimadda.
Guddoomiye Muungaab oo ka mahadnaqay taageerada hagar-la’aanta ah ee ay Dawladda Imaaraadku siiso Soomaaliya, ayaa waxa uu Safiirka la wadaagay qorshayaasha mudnaanta u leh Dowladda Hoose ee Muqdisho oo ay ka mid tahay dhismaha iyo dayactirka waddooyinka, hirgelinta bullaacadaha si loo maareeyo caqabadda daadadka xilli-roobaadyada, iyo arrimaha kale ee isugu jira horumarinta waxbarashada, caafimaadka, nadaafadda iyo amniga.
Safiirka Imaaraadka, danjire Alromithi ayaa dhankiisa ballanqaaday fududeynta sidii loo hirgelin lahaa mashaariic waxtar u leh dhinacyada taabanaya baahida gaarka ah ee ka jirta caasimadda, isaga oo intaas ku daray in ay ku dadaali doonaan sidii loo suurtogelin lahaa isdhaafsiga booqasho khibrad-wadaag ah oo dhex mara maamullada caasimadda Muqdisho iyo Abu Dhabi, si sare loogu qaado aqoonta, karaanka iyo agabka muhiimka u ah u-adeegista bulshada Soomaaliyeed.
